Топлиот пречек во Грција со ладни резултати за односите

Денешната посета на министерот за надворешни Никола Попоски во Атина иако во временски рамки може да се оцени како историска сепак, не донесе ништо значајно во односите со Македонија, ниту пак ги доближи позициите за решавање на спорот за името.

Првиот македонски дипломат по службените средби со колегата Коѕиас и преставници од грчкиот државен врв оцени дека за надминување на меѓусебните проблеми ќе треба да се искачат големи планини и се уште постојат многу суштински разлики. Сепак, од посетата на грчката престолнина има сигнали за подобрување во неколку области.„Разговаравме и за подиректна соработка во делот на европските интеграции. Надвор од спорот со Грција можеме да споделиме искуства кои можат да ни бидат корисни во процесот на пристапување кон Унијата“, изјави министерот Попоски.