Заев: Ќе ја убедиме ЕК да донесе одлука за почнување преговори

Дојдовме со аргументи дека се создадени позитивни случувања по долгиот, одложен процес на нашите интеграции во ЕУ, порача премиерот Зоран Заев преку социјалната мрежа „Твитер“, на почетокот на дводневната посета на Брисел.

Тој истакнува дека Владата ќе продолжи да ги спроведува реформите и волјата на граѓаните, но и да го убедува Брисел следната година да даде препорака за почеток на претпристапните преговори со ЕУ.

„Продолжуваме да даваме резултати со силна посветеност и несомнена политичка волја, во интерес на граѓаните. Тука сме да ја покажеме подготвеноста на Македонија и да ја убедиме Европската комисија да донесе одлука за отпочнување на преговори за нашата земја во првата половина од 2018 година“, напиша Заев на Твитер.

Тука сме да ја покажеме подготвеноста на #Македонија и да ја убедиме @EU_Commission да донесе одлука за отпочнување на преговори за нашата земја во првата половина од 2018 година.

— Зоран Заев (@Zoran_Zaev) December 5, 2017

Заев за време на дводневната работна посета на Брисел ќе се сретне претседателот на Европскиот парламент, Антонио Тајани, со претседателот на Европската комисија, Жан-Клод Јункер, со високата претставничка за надворешна политика и за безбедност на Европската Унија, Федерика Могерини, како и со комесарот за проширување и за соседска политика, Јоханес Хан.