Собранието ја констатираше оставката на Ставрески, опозицијата го испрати со тешки обвинувања
Денеска попладне Собранието ја констатираше оставката на вицепремиерот и министер за финансии Зоран Саврески. Како негов наследник доаѓа Кирил Миновски, кој доаѓа од директорското место во Управата за јавни приходи. Од него опозицијата побара да троши помалку и да биде потранспарентен од Ставрески.
– Прво барање што го очекуваме од новиот министер е да троши помалку за чоколадо, а повеќе за леб, граѓаните ни се гладни, сиромашни и бараат подобар животен стандард. Во изминатите 10 години потрошивте многу пари на чоколади и сопствени задоволства, а малку дадовте на граѓаните. Им земавте 25 милиони евра, а им вративте само 20 отсто. Затоа Македонија руши рекорди по сиромаштија. Да не се трошат пари на проекти као Скопје 2014. Второто барање е да го зголемите нивото на транспарентност во трошење на парите. Господине премиер државата се наоѓа на дното според транспарентноста, се наоѓаме во група на земји како Зимбабве и Уганда. Граѓаните и стопанството не знаат зошто се трошат нивните пари. Очекуваме од вас денеска или утре ќе ја задолжите за нови 230 милиони евра очекувам новиот министер да излезе пред јавноста и да каже каде и за што ќе се потрошат овие пари. Очекуваме со новиот ребаланс на буџетот да скратите на економска промоција, на патни трошоци и на луксизирање на министрите и институциите, а парите да се насочат за економски развој на државата – рече Марјанчо Николов од СДСМ.
Поради здравствени причини, Зоран Ставрески вчера поднесе оставка од функцијата вицепремиер и министер за финансии во Владата на Република Македонија. Тој беше дел од Владата предводена од ВМРО-ДПМНЕ од 2006-та година на позицијата потпретседател задолжен за економски прашања, а од 2009-та година и на позицијата министер за финансии.