Со дронови ќе се шферцуваат лекови за абортус

Холандската организација за правата на жените Women on waves ќе организира пренос на лекови за абортус во Полска каде легалниот абортус е тешко достапен поради строгите конзервативни закони. Секој пренос на лекови преку граница без оглед на нивната намена е забранет но, организацијата нашла дупки во германските и полските закони користејќи дронови.

Со едно беспилотно летало кое не носи тежина повеќе од 5 килограми не се навлегува во областа на комерцијална употреба на леталото, а пренесувајќи само две шишенца со пилули за несакана бременост се запазуваат и прописите за лична употреба на лековите. Летот на дронот ќе се изврши блиску до полската граница и лековите ќе ги добијат жените во градот Слубице.

Идејата е да се привлече вниманието на медиумите и да се покрене прашањето за гаранција на репродуктивните права на жените во Полска, како и обезбедувањето на легален абортус и лесен пристап до лекови за контрацепција. Women on waves е организација која работи со клиники за абортус на бродови и им помогаат на жените од земјите каде прекинувањето на бременоста е забрането да извршат абортус во „територија“ на друга држава блиску до брегот.