Романот Дваесет и првиот на Томислав Османли ќе биде објавен и на бугарски јазик

Романот „Дваесет и првиот“ на Томислав Османли ќе биде преведен на бугарски јазик , а ќе го објави издавачката куќа „Персеј“ од Софија. Станува збор за издавачка куќа која е фокусирана кон објавување современи скандинавски, руски и бугарски автори, и дела од светската класика.

Во последно време оваа  реномирана издавачка куќа покажува интерес за објавување македонски автори од сите генерации. Неодамна во издание на „Персеј“ беше објавен наградениот роман „Посмртна венчавка“ од Паскал Гилевски, а претходно беа потпишани договори за објави на преводи од шест млади македонски автори.

Романот „Дваесет и првиот“ на Томислав Османли е добитник на наградата „Роман на годината“ на „Утрински весник“ во 2010 година кога беше и македонски кандидат за книжевната награда „Балканика“.

Романот е објавен во Хрватска и во Србија, а за 12. Саем на книгата во Солун годинава имаше и интернационално издание на англиски јазик. До крајот на годинава се очекува и неговата објава на руски јазик во превод на Олга Панкика, во издание на московската издавачка куќа „Рудомино“. Романот се очекува да се појави во  2016 година.