Неколебливиот полицаец од Охрид се пожалил на мобинг

Сообраќајниот полицаец од Охрид кој доби големо медиумско внимание откако му напиша казна на својот командир бил принуден да земе боледување бидејќи постојано трпел притисоци и мобинг на работното место, известува порталот Охрид1 врз свои извори од СВР Охрид.

Како што дознава порталот тој поднел и пријава до Внатрешна контрола против неговиот претпоставен со која го пријавил за вршење на мобинг. Од сообраќајниот полицаец се барало да ја смени својата изјава, со што фактички би се обезбедила своевидна амнестија за казнетиот командир, нешто на што тој упорно се спротиставувал.

Три дена по ред на овој сообраќаен полицаец не му се давале работни задачи на терен и бил распоредуван да седи во една канцеларија без никакви работни обврски, притоа постојано барајќи од него да ја смени изјавата.

Во моментов сообраќајниот полицаец е на боледување заради психичка тортура, а Охрид1 испрати прашање до Полицијата дали е поднесена пријава против претпоставениот командир кој барал да се промени изјавата.

Извор: Охрид1