Заев единствен кандидат за претседател на СДСМ
Засега не можеме да излеземе со информации, затоа што треба да провериме какви пријави се стигнати на конкурсот. Дури од денеска ќе може да дадеме соодветни информации, изјави вчера портпаролот на СДСМ, Петре Шилегов на прашањето колку кандидатури за претседател на партијата и за членови на Централниот и Надзорниот одбор на СДСМ се пристигнати до завчера, кога истече рокот за самокандидирање.
Сепак од други извори во СДСМ дознаваме дека најверојатно нема никог друг кандидиран за претседател на СДСМ освен актуелниот лидер Зоран Заев, како и дека „зад него застануваат сите општински организации на партијата“.
Според роковникот, кандидатурите ќе се доставуваат до Централниот одбор на партијата, по што на 17 мај, односно в среда, Централниот одбор ќе ги утврди предлог-листите на кандидатите за претседател на партијата и за членови на нејзиниот Централен и Надзорен одбор, а потоа следуваат 6 дена за презентирање на кандидатурите. Утврдување на кандидатите ќе се прави на 27 мај, а потоа истиот ден, на редовниот конгрес на СДСМ, ќе се изврши изборот.