Вработен во ЦСР Кратово до Заев: Ќе те ловиме додека не завршиме со тебе

Заканите по живот кон лидерот на СДСМ, Зоран Заев не стивнуваат. Лицето Јован Ване Петров, вработен во Центарот за социјални работи во Кратово му се заканува на Заев дека ловот е отпочнат и нема да престанат додека не завршат со него.

– Зоран Заев, за разлика од твоето обезбедување кое те прашало дали да пука, а ти си дал дозвола ние нема и не прашуваме за одобрение никого. Ловот е отпочнат, ќе те ловиме додека не завршиме со тебе, напиша Петров на социјалните мрежи.

Петров упатувал закани и навреди и до пратеничката Фросина Ременски. Тој на својот Фејсбук профил објавувал статуси каде и се обраќал на Ременски со погрдни зборови. За ваквиот однос, Ременски го известила и актуелниот министер за труд и социјална политика, Ибрахим Ибрахими каде укажала дека тој има обврска да укаже и да ги укори поведенија кои го рушат угледот на МТСП и центрите и е неетичко/казниво поведение.

– Лицето Јован Ване Петров е вработен во Центарот за социјални работи – Кратово, а како што гледам си додал и улога на Ќосе. Во текот на целиот мандат што го имав во МТСП се занимаваше со мене (именувајќи ме како Фросина ТАШАК Ременски). Пишуваше се и сешто, бидејќи си мислел дека е голем фраер и ништо не му може, па дури и неговиот министер, напиша Фросина Ременски на својот фејсбук профил.

Екс министерката за труд и социјална политика по објавените повици за ликвидација на Зоран Заев и навредите упатени кон неа од страна на Петров го повика Основното јавно обвинителство како и секторот во МВР кој се занимава со „анализа на профилите на социјалните мрежи“ да ја имаат на ум нивната одговорност за постапување, непостапување или пропуштање по вакви и слични објави.