ВМРО-ДПМНЕ продолжи со навредите против Заев, но му вети поддршка ако се откажел од Платформата
ВМРО-ДПМНЕ продолжува со истото соопштение кое го испраќа речиси секој ден со наводна можност за поддршка на Зоран Заев да формира малцинска влада ако се откаже од Платформата од Тирана, но не изостанаа сите можни навреди на негова сметка, како и против СДСМ.
– Без срам кримининогениот СДСМ отиде до таа крајност велејќи дека ќе дебатираат по прашања кои се од национален и државен интерес, консултирајќи партиски експерти од потписниците на Тиранската Платформа. Дебатата започна да се реализира на дело.
Питер Ванхауте откривајќи ги намерите на аболицираниот Зоран Заев отвори дебата за федерализација на Република Македонија. За оваа скандалозна изјава на Питер Ванхауте, криминогениот СДСМ молчи, како што молчи и за шокантните изјави на албанската пратеничка Месила Дота, која директно се закани на аболицираниот Зоран Заев дека ако тој отстапи од платформата, тогаш сите Албанци ќе се ангажираат околу остварување на сонот за Илирида. Молчат и кога Зијадин Села, го негираше македонскиот идентитет, велејќи дека пред 100 години Македонци не постоеле на овие простори. Молчат и за скандалозната изјава на Трифун Костовски во која јасно и гласно вели да им се одземе правото на Македонците по потекло од Егејска Македонија да го кажат сопственото мислење и да се борат во заштита на највисоките државни и национални интереси.
Загриженоста и револтот на граѓаните е се поголем токму заради неискреноста на Зоран Заев.
Затоа Зоран Заев треба што е можно поскоро да ја отфрли Тиранската Платформа и да се откаже од реализација на елементите содржани во неа.
ВМРО-ДПМНЕ го охрабрува Зоран Заев уште еднаш да се откаже од уцената. Зоран Заев нека се откаже јасно и гласно од Тиранската Платформа, а ВМРО-ДПМНЕ ќе даде поддршка за малцинска влада. Втората опција која му стои на располагање е да прифати нови парламентарни избори заедно со локалните каде граѓаните ќе може демократски да изберат програма,платформа, вклучително и онаа од Тирана, доколку во неа верува Зоран Заев, велат од ВМРО-ДПМНЕ.
