Се повлекува контроверзниот учебник „Општество“

Министерството за образование ќе го повлече учебникот за четврто одделение по предметот општество, откако Народниот правобранител утврдил дека во него постои дискриминација врз основа на брачен и семеен статус, како и врз религиска основа.

Министерката за образование, Рената Дескоска, во изјава за „Сакам да кажам“, вели дека комисијата донела предлог за повлекување на спорниот учебник и оти таа денеска ќе го потпише решението.

Авторката на учебникот, Билјана Живковиќ, во нагледното средство бара децата да донесат фотографии од свадбата на своите родители и да одговорат дали тие се венчани во црква, матично или друго.

Четириесетина мајки, кои живеат во еднородителски семејства, вонбрачни заедници и во брачни заедници, поддржани од осум организации поднесоа претставката до Омбудсманот.