Папата заминува од Лезбос со 10 бегалци

Папата Франциск понудил да земе 10 бегалци со него во Италија за време на историската посета на грчкиот остров Лезбос, што се смета за храбар гест на солидарност со мигрантите чиј прилив ја разниша европската политика. Грчката државна телевизија ЕРТ објави дека на 8 Сиријци и 2 Авганистанци ќе им биде понудено заминување. Вклучувањето на Авганистанците е многу симболичен потег, откако ЕУ престана да ги смета граѓаните од оваа земја како бегалци и не им ги одобрува барањата за азил.

Папата ручаше во бегалскиот центар на островот, кој е претворен во притворен центар, како дел од договорот меѓу ЕУ и Турција, а целокупната негова посета беше проследена со многу емоции. Грчките медиуми пренесуваат дека мало детенце му дало писмо за роднините во Италија, додека бегалците барале благослов.

Ватикан соопшти дека посетата на папата на Лезбос е од чисто хуманитарна и верска природа и нема намера да биде политичка или критичка за политиките на ЕУ.