Опремата за прислушување ќе се смести во посебен оперативен центар, рече Спсовски
Опремата за прислушување од УБК ќе биде преместена на посебна локација со цел поголема транспарентност и професионалност во работењето на службата, изјави Министерот за внатрешни работи, Оливер Спасовски, по средбата со претседателот Талат Џафери и координаторите на пратеничките групи.
– Веќе разговараме на оваа тема, имаме неколку предлози кои ги разгледавме како опции. Идејата е опремата да биде преместена од МВР. Најоптимално решение е да биде сместена во посебен оперативен центар, кој ќе биде задолжен за следење на комуникациите. Ова решение секако ќе биде разгледано од стручни лица и детално обработено на кој начин ќе ја реализираме оваа операција – рече Спасовски.
Прашан дали во моментов се прислушува, Спасовски рече се врши само следење кое произлегува од изречени мерки од Врховниот суд и Обвинителството. Тој најави дека се изготвува нов закон за следење на комуникациите и уште неколку други закони со кои ќе се спроведе реформа во државниот оддел за безбедност.
– Секој подзаконски акт кој ќе создаде одредени нејаснотии во врска со безбедноста на државата ќе биде променет. Најважно е во целиот овој процес на реформи во безбедноста да има инклузивност, пред сè во Парламентот, и преку дебата да дојдеме до соодветно решение. Наша цел е да ја заштитиме државата од одредени криминални дејствија – додаде рече Спасовски.