Стејт департмент: Да се зајакнат капацитетите на Македонија за борба против тероризам

Поради воениот притисок на екстремистите од Исламска држава, во 2016 година Европа била мета на масовни терористички закани, стои во извештајот на Стејт департментот за тероризам и се додава дека заканите и понатаму се присутни.

Во извештајот се наведува дека Исламска држава и понатаму е на врвот на организациите кои извеле најмногу напади. Сепак, и покрај тоа што ИД минатата година извршила напади во повеќе од 20 земји и е сè уште активна во Ирак, Сирија, Авганистан и во Пакистан, како и организациите што ѝ се лојални, како што е Ал шабаб во Африка, вкупниот број на терористички напади во светот во 2016 година е намален за 9 отсто во споредба со 2015 година. Бројот на смртните случаи во терористички напади минатата година е намален за 13 отсто.

Во делот од извештајот за Македонија се наведува дека македонските власти проценуваат дека членови и симпатизери на ИД и понатаму има во земјата. Стејт департментот потсетува дека Македонија во 2016 година спровела три различни антитерористички акции, од кои една била во координација со властите на Албанија и на Косово, што довело до апсење на 23 лица во Албанија, Косово и во Македонија.

„Владата во март усвои национална стратегија за антитероризам. Во стратегијата има дел посветен за заштита од насилен екстремизам, но не постои посебна национална стратегија за борба против насилен екстремизам и за заштита од него. Владата состави национален акционен нацрт-план за антитероризам и во ноември го достави на разгледување до Европската комисија. Сепак, во акциониот план недостигаат ознаки за имплементација, процена на финансирањето, како и механизми за надзор и за евалуација“, стои во извештајот.

Стејт департментот наведува дека потребно е да зајакнат капацитетите на Македонија за детектирање и за спречување терористички акти без меѓународна поддршка. Во извештајот, исто така, се наведува дека на земјата ѝ недостига правна рамка за борба против перење пари и финансирање тероризам, како и криминализација на финансирањето на тероризмот, а нема ни јасни механизми за имплементирање на мерките од ОН. Како посебен проблем се наведува и тоа што земјата има премногу комплицирана регулатива за замрзнување и за конфискација на терористички средства, која се темели на судска пресуда. Според Стејт департментот, Македонија има агенција за управување со запленети средства, но таа има ограничен капацитет и активности и потребни се дополнителни обуки.