Продолжен притворот на возачот на „мерцедес“ кој прегази тинејџер

Скопското обвинителство до Кривичниот суд поднесе обвинителен акт против Ј.Д., кој лани на 20 септември на регионалниот пат Скопје – Велес управувајќи „мерцедес” удри во 19-годишно момче кое по десетина дена почина.

„Врз основа на наодите во извештаите по издадените наредби, од страна на надлежен јавен обвинител утврдено е дека обвинетиот не се придржувал кон прописите за учество во сообраќајот. Во моментот на незгодата бил со битно намалена пресметливост и тежок степен на пијанство. Возилото го управувал во насока од Велес кон Скопје​, со недозволена и неприлагодена брзина кон условите и состојбата на патот и притоа удрил во момчето кое се движело по десната коловозна лента во спротивната насока“, соопшти Обвинителството.

Во текот на истражната постапка поради непочитување на мерката – куќен притвор таа беше заменета со притвор, а надлежниот јавен обвинител со обвинителниот акт до Основниот суд Скопје 1 – Скопје достави и предлог за продолжување на притворот.