ДОМ бара да се прогласи вонредна состојба поради загадувањето
ДОМ повторно бара од утре до крајот на февруари 2016 година да се прогласи вонредна состојба поради загадувањето.
Партијата предлага и неодложни мерки низ градовите меѓу кои дефинирање зелена зона за пешаци и велосипедисти, затворање на градилиштата, миење на улиците со вода, субвенции за печки со целосно согорување и квалитетни горива за домаќинствата, строга контрола на индустриските постројки и редовно собирање на отпадот.
Според ДОМ, треба да се воведе и забрана за возила под 4 ЕУ стандард во градскиот сообраќај, да се воведе принципот на пар-непар, да има повеќе автобуси во јавниот превоз, како и да се воведе јавен превоз во градови кај што го нема.
– Ова се итни мерки што се прават со скромен буџет, а можат брзо да дадат резултат. Владата не смее да се оглушува на протестите и барањата на граѓаните, зашто тие се борат и за нивните деца, наведува ДОМ и најавува дека ќе го поддржи утрешниот граѓански протест против загадениот воздух.