Дијана Илина е новото супер засилување на ЖРК Вардар
Ракометниот првак на Македонија, женската екипа на Вардар за новата сезона се засили со младата Дијана Илина која има 20 години и веќе е репрезентативка на Белорусија. Таа доаѓа од белорускиот првак, Гомељ и сезоната ја заврши со титула во Белорусија и во Балтичката регионална лига. Има интернационална кариера со тимот на Астраханочка во Русија, каде настапуваше во есенскиот дел од ланската сезона, пред да се врати во Гомељ.
„Многу малку знам за Вардар, освен само што гледам натпревари на клубот во Лигата на шампионите. Вардар е навистина голем клуб со големи амбиции. Како и секој играч и мојот сон е да играм во ЛШ и среќна сум дека ја добив оваа шанса. Ќе дадам се од себе, ова е навистина понуда што не се пропушта. Многу добра шанса за мене како млад играч да настапувам за екипа како Вардар и да имам вака силни натпревари. Добра шанса да го пробам и да го осетам овој квалитет на игра, изјави Илина по доаѓањето во Скопје.