Вардарската регата "Гемиџии" заплови од Велес

Од Велес низ водите на Вардар утрово заплови 17-та односно 6-та возобновена Вардарска регата „Гемиџии“. Регатата се вози со 13 гумени сплавови и дрвената гемија, која втора година ќе плови по Вардар, а која е реплика на гемијата со која велешките трговци носеле стока по Вардар се до Солун.

Ангелче Гушев водач на регатата информира дека годинава има рекорден број со над сто учесници, како и гости од Србија и Бугарија со што Вардарската регата „Гемиџии“ има и меѓународен карактер. Себо Шаќиров од Здружението на граѓани „Гемиџии“ еден од искусните водачи на регатата информира дека претходно направиле увид во состојбата со реката Вардар и оти водостојот на водата е задоволителен за пловидба, но поради голем број на паднати стебла на дрвја реката крие бројни опасности поради што се превземаат сите мерки на безбедност на пловење.

– Реката има свои опасности. Знаете како вика народот со вода и со оган не се игра. Затоа сме будни. Во секој чамец ќе имаме по двајца кајакари и по еден спасител. Со учесниците пред поаѓање имавме едукативен час и им кажавме како треба да се однесуваат за време на пловидбаа, се поради нивната безбедност, потенцира Шаќиров. Регатата се вози во четири етапи, а последната е во недела во Гевгелија. Желба на учесниците на Вардарската регата е во скора иднина таа да плови низводно од Вардар се до Солун.