Тројца повредени во тепачка на две групи кај Бит-пазар

Две групи сиоќа предизвикале инцидент кај Бит-пазар, во кој, според полициски информации, повредени се три лица, а оштетени се и два автобуси, јавува „Мета“.

Од МВР не ги соопштуваат причините за инцидентот, а дел од медиумите објавија дека тој бил предизвикан од навивачи кои се враќале од фудбалскиот натпревар меѓу Вардар и Реал Сосиедад (0:6).

Како што соопшти МВР, синоќа околу 21 часот било пријавено дека на булеварот Крсте Мисирков на автобуска постојка во автобус со број 50 на Јавното сообраќајно претпријатие „Скопје“, од страна на повеќе лица бил нарушен јавниот ред и мир, а биле нападнати и патници кои биле внатре во автобусот.

Инцидентот почнал на горниот кат од автобусот, каде што настанала тепачка, која потоа продолжила и на долниот кат. Едно од лицата што учествувало во тепачката го фатило воланот на возачот, по што автобусот удрил во друг автобус со број 20.

Откако биле отворени вратите од автобусот, физичката пресметка продолжиле на постојката, а по интервенцијата на полицијата, лицата се разбегале во различни правци.

Во инцидентот повредени се три лица, кои со возила на итна медицинска помош се префрлени во Ургентниот центар.

Засега, како што информира МВР, е приведено едно лице со иницијали Р.Б. и се преземаат мерки за целосно расчистување на случајот и за идентификување на сите учесници во насилството.