„Ослободување на Скопје“ вечерва ќе ја доживее својата премиера
„Ослободување на Скопје“, во режија на Раде Шербеџија, премиерно ќе биде прикажан на вечерашното отворање на 37-иот Интернационалниот фестивал на филмска камера „Браќа Манаки“ во Битола, а утре во киното „Милениум“ ќе ја има скопската премиера. „Ослободување на Скопје“ е прв режисерски филмски проект на Раде Шербеџија, што го направи заедно со синот Данило. Филмот е базиран познатиот драмски текст на Душан Јовановиќ.
Со дејствие сместено во Втората Светска Војна, филмот ќе ја раскаже приказната низ очите на 11-годишниот Зоран, за страдањата и хоророт на луѓето што поминуваат низ војната. Додека неговиот татко е партизан што се бори против Германците, неговата мајка Лица започнува љубовна афера со германски офицер. Поминуваат годините, доаѓа денот на ослободувањето на Скопје. Тоа што останува да се запрашаме е како понатаму? Дали, општеството ќе ја казни Лица за тоа што го направи и дали семејството ќе ја постигне некогашната хармонија?
Филмот е во македонско-хрватско-финска продукција, меѓу кои и македонските Кино-Око и Партисанс. Продуценти на филмот се Роберт Насков, Горјан Тозија, Владимир Анастасов и Игор Нола, а автор на музиката е Влатко Стефановски. Во главните улоги настапуваат 11-годишниот Давид Тодосовски, Силвија Стојановска, Раде Шербеџија, Луција Шербеџија, Небојша Глоговац, Мико Ноусаинен, Петар Мирчевски, Јани Вирман, Денис Абдула, Аксел Мехмед, Дејан Лилиќ и други.
По вечерaшата премиера на Браќа Манаки во Битола, филмот утре (11 септември) ќе ја има својата скопска премиера во киното „Милениум“, а подоцна ќе продолжи да се прикажува на редовниот репертоар во кината Cineplexx и Милениум.