Стартува АКТО – Во фокусот ревитализирање на Офицерскиот дом во Битола
12 издание на фестивалот за современи уметности АКТО, оваа година ќе се одржи на 1 и 2 септември во Битола, а во фокусот на настаните ќе биде иницијативата за ревитализирање на еден од најзначајните културни споменици во градот – Офицерскиот дом.
Овој културен белег на градот со вековна традиција, веќе долго време е оставен на немилоста на времето, затворен за граѓаните и без соодветен третман од надлежните институции. Токму затоа, акцентот на активностите на фестивалот АКТО ќе биде ставен врз реактуелизирање на темата за потребата од заживување на Офицерскиот дом во Битола и негово враќање во функција на културата и граѓаните.
Во тој контекст, клучниот настан на ова издание на фестивалот ќе биде јавната дебата, под мотото „Каков Офицерски дом ни треба?“, која ќе се одржи на 2 септември во дворот на Офицерскиот дом, со почеток во 12 часот.
На дискусијата покрај министерот за култура на Република Македонија, Роберт Алаѓозовски, ќе присуствуваат и пратеници од Собранието на РМ, претставници од локалната самоуправа, експерти за културно наследство, како и повеќе организации и индивидуалци од Битола кои низ годините се залагале за одбрана и враќање на Офицерскиот дом во функција на јавно добро. Дискусијата ќе биде од отворен карактер, па битолчани ќе можат да ги искажат своите ставови по прашањето пред претставниците од државните институции.
Покрај дебатата за Офицерскиот дом, како и секоја година фестивалот за современи уметности АКТО ќе понуди разновидна програма која вклучува многу изложби, работилници за музичари, програма за деца, перформанси, концерти и DJ настапи, кои ќе се одржат на неколку локации во Битола и тоа во дворот на Офицерскиот дом, во мезе – бар Јагода, Магаза Битола, Задруга Артикултура и кафе бар Радост.
Повеќето активности во програмата на ова издание на АКТО, на свој начин ќе говорат за значењето на Офицерскиот дом, а целосната програма на 12 издание на фестивалот, можете да ја погледнете овде
Користејќи го своето наследство на активности кои се случиле токму во Офицерскиот дом, фестивалот АКТО повикува уште еднаш на згрижување на овој објект и на негова заштита, обраќајќи им се на сите индивидуалци, заедници и сектори во Битола да се приклучат кон иницијативата за ревитализирање на еден од најзначајните културни белези на градот.
ПОП АП АКТО АКЦИЈА е поддржан од Фондација Фридрих Еберт – канцеларија Скопје, Цивика мобилитас – Македонија и ЛГБТИ Центар за поддршка.
Соработници на фестивалот се: мезе – бар Јагода, ЛГБТи Центар за поддршка, НУ Музеј и Завод Битола, НУ Центар за култура Битола, Задруга Артикултура, кафе бар Радост и Види вака.
Здружението за уметност и култура ФРУ – Факултет за работи што не се учат од Битола/Скопје, кое го организира АКТО, е замислено како отворена едукативна и продукциска платформа во полето на современата уметност и култура, со фокус на култивирање на критичко, ангажирано и активно учество на граѓаните во политичкиот, општествен и уметнички контекст во различни средини.
