Орав ги повикува политичките лидери на отворен дијалог за решавање на кризата
Евроамбасадорот Аиво Орав истакна дека сите политички лидери мора заеднички да се вклучат во отворен дијалог за решавање на политичката криза и сите партии да се согласат за понатамошната имплементација на пржинскиот договор, додавајќи дека Европската унија е сериозно загрижена за моменталната состојба.
„Владеењето на правото е основа за силно демократско општество, а исто така важно е да се имплементираат реформските приоритети што ги предложи Европската комисија. Остануваме загрижени за проблемите со кои се соочува Специјалното јавно обвинителство при својата работа. Ги повикуваме сите тела, особено партиите кои се согласија да се воспостави СЈО, да престанат да го опструираат и да му дадат целосна поддршка“, истакна евроамбасадорот.
„Сите повторуваме дека Пржинскиот договор останува најдобар начин за земјата да излезе од актуелната криза. Во интерес на земјата и на нејзиниот евроатлантски пат е главните политички партии да договорат заеднички начин за излез од кризата во следните денови, а не во недели или месец“, додаде Орав.