Николовски: Нема толерирање за непочитување на здравствено безбедносните мерки

Новиот вицепремиер за борба со корупцијата Љупчо Николовски најави законски измени за зголемување на надележностите на инспекциските служби откако викендов се видоа многу слабости. Елитни клубови иако беа опоменати и казнети од инспекторите по извршениот надзор продолжија со одржување на скандалозните забави без никакво почитување на протоколите за спречување на ширењето на заразата со корона вирусот.

„Заедно со министерот за внатрешни работи, Оливер Спасовски, министерот за здравство, Венко Филипче, претседателката на Инспекцискиот совет, Магдалена Филиповска – Грашковска и директорите на инспекциските служби, одржавме состанок на кој се дискутираше за инспекциските контроли изминатиот викенд, план за идни активности и зголемување на нивните надлежности кои ќе важат на национално, но и на локално ниво.

Предлог измените ќе бидат доставени на утрешната владина седница, а нашите координации ќе се спроведуваат редовно и во иднина.

Здравјето на граѓаните е пред се и затоа нема толерирање за непочитување на здравствено безбедносните мерки. Апелирам, сите, без отстапки, доследно да ги почитуваат здравствените протколи и препораки“, извести Николовски.