Наградата за најгрдо куче на светот за 2015 ја освои Квазимодо

На овогодинешниот натпревар за „Најгрдо куче на светот за 2015“ во Калифорнија, првото место го освои 10-годишниот мелез Квазимодо и главната награда од 1.500 долари.

Името е инспирирано од грбавиот Квазимодо од  „Ѕвонарот на Богородичната црква во Париз“ поради деформитетот на `рбетниот столб.

Овој натпревар се одржува веќе 27 години и има за цел да ја подигне свеста за напуштените кучиња и да ги поттикне луѓето да вдомуваат кучиња од шинтерница. Квазимодо, која и покрај машкото име што го носи е сепак женка, била напуштена и живеела во шинтерница околу една година, но за среќа била посвоена од ветеринар во Флорида и несомнено се наоѓала во добри раце.

Минатата година Квазимодо на истиот натпревар го освоила второто место.