Над 300 турски војници и натаму се кријат по обидот за пуч

Триста и единаесет турски војници и натаму се кријат по обидот за пуч на 15 јули, а деветмина од нив се генерали, изјави турскиот министер за одбрана Фикри Ишик, во интервју за телевизискиот канал Си-Ен-Ен-Турк.

Според министерот тие се наоѓат на територијата на Турција. Тој не даде коментар што ќе се случи со војниците, кои избегаа во Грција, по обидот за преврат и се задржани од грчките власти.

– Не недостигаат тенкови, авиони, хеликоптери, бродови или друга борбена техника. Има сепак значителна количина муниција, која ја користеле учесниците во пучот, рече Ишик.

Истовремено со указ, кој беше објавен во Службен весник 94 генерали од копнените сили, 22 адмирали, 44 генерали од воено-воздухопловните сили и шест генерали и еден адмирал од военомедицинската академија ГАТА биле прераспределни на други должности. Со истиот указ генералот Зекаи Аксакал ќе остане на претходната функција, командант на специјалните сили.

На прашањето дали апсењата и отпуштањата на војниците завршиле, министерот одговори дека продолжува истрагата на обидот за пуч и оти веројатно ќе има уште апсења и отпуштања.

Ишик посочи дека оваа година се откажува празнувањето на традиционалниот Празник на победата на 30 август, професионален празник на турската армија.

Ова е првпат од формирање на турските вооружени сили овој празник да не се одбележи. На 30 Август во Турција се слави победата на турската армија, предводена од Мустафа Кемал Ататурк над грчката војска за време на турската ослободителна војна (1919-1922).