Концерт во чест на Принц на 13 октомври во Минеаполис

Семејството на починатиот американски музичар Принц најави концерт во негова чест на 13 октомври во Минеаполис. Концертот ќе биде одржан на стадионот во родниот град на славниот музичар, а продажбата на влезници за овој концерт ќе започне од следниот месец, додека првите имиња на изведувачите ќе бидат наскоро објавени.

„Возбудени сме што ќе ги собереме сите во славењето на музиката на Принц и неговото наследство. Нема подобро место за тоа од неговиот роден град Минеаполис“, најавија членовите на семјеството на популарната музичка ѕвезда. Принц почина во својот стан во Пејзли парк во Минеаполис на 21 април на 57-годишна возраст поради предозирање од лекови против болки.

Мадона и Стиви Вондер ги посветија своите настапи на легендарниот музичар за време на доделувањето на Билборд музичките награди, додека Ди Анџело Шеила Е, The Roots и Жанел Моне учествуваа во настапот посветен на Принц на доделувањето на БЕТ наградите во јуни. Во меѓувреме, семејството на Принц најави дека паркот Пејзли ќе биде претворен во музеј.