Илир Мета го замени Бујар Нишани на претседателското место во Албанија

Албанското Собрание во петокот попладне за нов претседател на државата го избра Илир Мета, досегашен претседател на Собранието.

Мета е избран за нов шеф на државата без присуство на пратениците на опозицијата, кои повеќе од еден месец ја бојкотираат работата на законодавниот дом.

Мета за нов претседател е избран во четвртата рунда на гласање, бидејќи во претходните три рунди немаше кандидати . Од вкупно 89 пратеници, за Мета гласаа 87.

Претходно владината коалиција составена од Социјалистите на премиерот Еди Рама и Движењето за Социјалистичка интеграција на Илир Мета, постигнаа согласност да останат во коалиција и на претстојните парламентарни избори кои се закажани за 18 јуни, но под услов Мета да добие поддршка од Социјалистите за претседател на државата. Мандатот на претседателот на државата е пет години, и Мета доаѓа на место на досегашниот претседател Бујар Нишани, инаку член на опозиционата Демократска партија .

Мета во својот поздравен збор нагласи дека ќе работи за продолжување на процесите на демократизација во земјата и продолжување на интеграциите на земјата во ЕУ.

„Членството во НАТО на Албанија е битен елемент за нејзината стабилност“, додаде Мета.