Дали сте задоволни од работата на Сугарески?! Преку ФБ, се прости од функцијата

Досегашниот министер за транспорт и врски во претходната влада Горан Сугарески на својот ФБ профил, ги наброја успесите во својот мандат и им се заблагодари на граѓаните за довербата. Тој напиша:

 

Почитувани граѓани

Имав огромна чест и одговорност да ја вршам функцијата министер за транспорт и врски во политичката и техничка Влада во изминативе три години. Се гордеам што бев активен и непосреден учесник во процесите за создавање нови вредности и перспективи за нашата држава.

Со силна посветеност, чесност и транспарентност работев во изминатиот период и верувам дека таквата работа остави белег во ресорот што го водев. Ги реализиравме историски најголемите инвестиции во патната и комуналната инфраструктура, во гасификацијата, во станбено- социјалната политика.

Помогнавме на голем број на граѓани и го подобриме нивниот живот и тоа беше мотивот што ме водеше секој изминат ден.

Нема подобар стимул од тоа кога ќе видите задоволни жители на еден град, на село или населба од изграден пат, канализација или водовод или некој друг значаен проект со кој сме го олесниле нивното живеење.

Тоа беше наградата за мене. 

Благодарност за укажаната чест да бидам Министер во Влада и во Министерството кое реализира голем дел од капиталните проекти, а сакам да изразам и јавна благодарност до вработените од Министерството за транспорт и врски за соработката и поддршката што ми ја дадоа. 

Развојот на нашата земја не застанува, има многу проекти кои треба допрва да се работат и уверен сум дека идниот министер Благој Бочварски исто така силно и посветено ќе продолжи со реализација на сите тие крупни капитални проекти во министерството.

Нашата визија за силна европска држава не застанува, напротив сега сме уште повеќе мотивирани да го продолжиме патот на просперитетот за сите граѓани…..

  

Сугарески дипломирал на Правниот факултет „Јустинијан Први“ при Универзитетот „Св. Кирил и Методиj“, каде станал и магистер по политички науки. Во периодот од 2000 до 2003 година бил советник во советот на Општина Прилеп, по што во таа општина до 2008 година работел како комунален инспектор.

 

Во периодот од 2008 до 2016 година бил пратеник во Собрание на Република Македонија. Во текот на пратеничкиот мандат, Сугарески бил член на парламентарната делегација за соработка со НАТО, на комисиите за прашања за избори и именувања, за одбрана и безбедност и на Законодавно-правната комисија, како и заменик-член на Комисијата за земјоделство, шумарство и водостопанство. Во периодот од 2013 до 2015 година бил заменик-координатор на пратеничката група на СДСМ, а потоа станал и координатор до 2016 година.