Чистките на списокот од граѓаните само за забавни цели

Очигледно е дека илјадниците пријави и откритија од страна на граѓаните за дубиозите во избирачкиот список ќе служат само за забава на социјалните мрежи доколку Државната изборна комисија не ги земе во предвид при вршење на теренската проверка која според оперативниот план ќе се врши на места однапред утврдени.
Сепак, интересно е што самите откритија на граѓаните се поклопуваат со усвоената методологија на ДИК, како на пример преголем број на гласачи на една адреса и издадени лични карти на локации кои немаат никаков правен и законски основ.

Една од причините поради кои ДИК се уште не одлучи дали да ги прифати пријавите од граѓаните е постапувањето по нив, односно дали секој кој ќе пријави нерегуларности ќе треба и да поднесе соодветен доказ или пак по пријавата ќе се делува по службен пат. Досега се стигнати над 3000 пријави од страна на граѓани, а теренската проверка на избирачкиот список треба да започне во понеделник.