Антикорупциска отвори предмет за деградирањето на Бакрачески
Државната комисија за спречување на корупцијата на денешната седница отвори предмет за случајот во Кардиолошкиот завод „Св. Стефан“ – Охрид каде што директорката Гордана Доневска направила прераспоредување на кардиологот Никола Бакрачески и го унапредила својот сопруг како раководител на болнички сектор, велат антикорупционерите за Плусинфо.
-Државната комисија за спречување на корупцијата ги следи сите информации што се објавуваат во јавноста од нејзиниот предмет на работа, вклучувајќи ги и информациите во врска со постапувањето на директорката на Кардиолошкиот завод „Св. Стефан“ – Охрид. Државната комисија за спречување на корупцијата на денешната седница отвори предмет за конкретниот случај и согласно законските надлежности ќе преземе соодветни дејствија – одговорија од Државната комисија за спречување на корупцијата на прашање на Плусинфо.
Министерството за здравство, претходно најави дека ќе го преиспитува работењето на директорката Гордана Доневска и дека за случајов ќе ја консултира и антикорупциската комисија.
– До овој момент до Државната комисија за спречување на корупцијата нема пристигнато барање за мислење од страна на Министерството за здравство – велат антикорупционерите.
Министерството за здравство соопшти дека детално ќе ја испита целата ситуација и ќе ја проверат целокупната документација и доколку постои каква било неправилност и непочитување на прописите од оваа област, ова прашање ќе биде регулирано во согласност со законските прописи.
