Алтхаузер: Кризата трае долго и е длабока – очекуваме формирање функционална влада

Меѓународната заедница по изборите очекува да се формира влада која ќе се посвети на реформите во процесот на пристапување во ЕУ. Приоритет во евроинтеграциите се реформите, а за нивно спроведување потребна е функционална влада, истакна германската амбасадорка Кристине Алхаузер која денеска се обрати на Меѓународната конференција „Добри практики за обука во земјите членки на ЕУ“ што се одржа во Секретаријатот за европски прашања.

– Кризата во Македонија трае долго и е длабока. Поминаа четири месеци од изборите, па сите и меѓународната заедница очекуваат да се формира влада, но прво треба да се избере спикер во Собранието. Приоритет во процесот на пристапување кон ЕУ се реформите кои треба интензивно да се спроведуваат, а за тоа е потребна функционална влада. Тоа е она што го чекаме – порача амбасадорката Алхаузер на новинарско прашање.

Вицепремиерот за евроинтеграции Арбер Адеми се согласи дека политичката криза трае повеќе од две години што е премногу долго, а сега прерасна и во институционална криза.

Според него, целата оваа ситуација влијае врз динамиката на спроведувањето на реформите од ЕУ агендата.

– Очекуваме да се најде решение за кризата, бидејќи проектите и реформите мора да се реализираат. Политичката криза мора да се реши, а институциите да профункционираат оти нема друга алтернатива – истакна Адеми.

Меѓународната конференција „Добри практики за обука во земјите членки на ЕУ“ беше организирана во рамки на твининг проектот „Понатамошна поддршка за зајакнување на капацитетите за ЕУ на Центарот за обуки на СЕП“. Проектот се спроведува од Германското сојузно министерство за економија и енергетика, Центарот за обука при СЕП и Секторот за централно финансирање и склучување договори при Министерството за финансии. Вредноста на проектот е 250 илјади евра, а трае девет месеци.