Започна екстрадицијата на осомничениот за тероризам кој побегна на Косово

Како што информираат од обвинителството, постапката за екстрадиција од Косово е со меѓународна правна помош, а и дел од доказите ќе бидат обезбедени на тој начин.

Јавното обвинителство започнало процедура за екстрадиција на Сулејман Османи, осомничениот за тероризам, кој избега на Косово, а беше дел од групата која отвори оган врз специјалците во кумановската населба „Тоде Мендол“ на почетокот од мај. Како што информираат од обвинителството, постапката за екстрадиција од Косово е со меѓународна правна помош, а и дел од доказите ќе бидат обезбедени на тој начин.

Обвинителството ја завршило и постапката за идентификација на осомничените која ја спроведувала преку меѓународна правна помош. Прибавено е криминалистичко – техничко вештачење на предметите и трагите прибрани од лице место по извршениот увид, се вели во соопштението на обвинителството. Во тек е сослушување на сведоци и осомничени во предметот.