Нова кривична пријава за малверзации во МЗШВ

Опозицијата денеска поднесува нова  Кривична пријава за злоупотребите во МЗШВ.

Пријавата се однесува на веќе објавениот скандал во МЗШВ со исплатите на фирмите во сопственост на семејството на градоначалникот од ВМРО-ДПМНЕ, Трајче Димитриев а е  против поранешниот министер за земјоделство, Љупчо Димовски, против директорот на Платежна агенција, Тони Димовски и против Виолета Димитриева.

„Врз основа на доказите со коишто располагаме постои основано сомнение дека спротивно на законите и прописите во Република Македонија склучиле договори за цесија тешки стотици илјади евра за фирмата Корал од Демир Капија.

Сопругата на градоначалникот Виолета Димитриева, иако била избришана од Централен регистар и како управител и како сопственик на Корал, го склучува договори и потпишува во име на фирмата.

Договорот е потпишан од министерот Димовски, само со потпис од сопругата Димитриева, без печат на фирмата. Тоа не било проблем ниту за директорот на платежната агенција експерно, во еден ден да ги исплати парите.

На овој криминален начин, наместо кај вистинските земјоделци парите завршувале во фирми блиски до ВМРО-ДПМНЕ.

Ова е уште еден пример зошто правда во Република Македонија мора да има.

Ова е уште еден доказ зошто досега ниту една аболиција од Иванов не е поништена.

Никола Груевски преку нарачаната аболиција кај Горге Иванов сака да се спаси од одговорнста за криминалот.

Правда ќе има. Аболицијата мора целосно да се поништи и ќе се поништи.

Секој што го прекршил законот мора да одговара и ќе одговара“, изјави Љупчо Николовски, член на Извршниот одбор на СДСМ.