Италија не знае што да прави со имотот на мафијашите
Организираниот криминал во Италија доколку се гледа преку економски параметри е една од најдобро развиените индустрии, па Владата на Италија има проблеми со менаџирањето на целиот запленет имот од мафијашите. Државата располага со 3000 компании, 12000 имоти и над 2 милијарди евра во банкарски депозити.
„Во Италија е потешко да се води сметка за целиот запленет имот, отколку самата борба со мафијата“, оцени Микеланџело Патане јавен обвинител од Сицилија. Во најновата акција на полицијата е запленет имот вреден 1.7 милијарди евра во кој се вклучени луксузни вили, но и околу 700 станбени објекти, па дури и елитна плажа на приморјето на Катанија.
Властите трошат многу средства и ресурси за управување и одржување на целиот запленет имот бидејќи пазарот на недвижности е слаб финансиски, а исто така треба да се внимава и на судските процеси во кои се вклучени илјадници оштетени граѓани.