Зурлите и тапаните одекнаа за 43-тата Галичка свадба
Традицијата повторно оживеа во Галичник со големата веселба за 43-тата Галичка свадба. Оваа година честа да го вратат духот на претците ја имаа младоженците Сандра Станковиќ и Александар Ристески кои се венчаа во црквата „Свети Петар и Павле“ во Галичник и ставија круна на дводневната манифстација поминувајќи низ сите обичаи и традиции кои се карактеристични за мијачкиот крај.
Како и секоја година така и оваа се насобра огромен народ, многу печалбари кои ги напуштиле родните огништа, но не ја заборавиле родната грутка.
Во двата дена, со звукот на тапани и зурли, беа преставени: канењето на сватовите, кумот, свекрвино оро, гледањето низ прстен, носењето на невестата на вода, поставувањето на свадбарскиот бајрак, канењето на мртвите, бричењето на зетот, земањето на невестата, замесувањето на лебот и редица други обичаи кои биле дел од свадбените веселби на мијаците во минатото.