Законот за јазиците денеска пред пратениците
По подолга пауза поради локалните избори, денеска во Собранието ќе се врати расправата за законот за употреба на јазиците. Законот е точка на дневен ред на 15-тата седница, која беше прекината пред почетокот на кампањата за локалните избори.
Со предлог-законот за употреба на јазиците, се предвидува во сите органи на државната власт во Република Македонија, централни институции, јавни претпријатија, агенции, дирекции, установи и организации, комисии, правни лица кои вршат јавни овластувања согласно закон и други институции, службен јазик покрај македонскиот јазик и неговото писмо да биде и јазикот што го зборуваат 20 проценти од граѓаните на Република Македонија и неговото писмо, (албански јазик).
Во расправата по првото читање на законот за збор беа пријавени шеесетина пратеници.
На дневен ред на Собранието е и законот за употреба на македонскиот јазик, како и законот за ваучери за набавка на информатичка опрема за студенти.
На крајот на листата на точките за дневниот ред се и интерпелациите за министерот за финансии, Драган Тевдовски, министерот за култура Роберт Алаѓозовски, и интерпелацијата за министерот за животна средина и просторно планирање, Садула Дураку.
