Заев: Специјален обвинител со цела автономија до следната недела

Опозицијата се повеќе пристиска да се избере Специјален обвинител кој е дел од политичкиот договор од Пржино. СДСМ и нејзиниот лидер Зоран Заев очекуваат веќе наредната недела ова прашање да биде поставено на дневен ред во Собранието и да се донесат потребните законски измени кои ќе му овозможат на некој правен експерт да има целосна автономија при извршување на функцијата како Специјален обвинител.

„Јас би бил среќен да биде тоа 7-ми, со законско решение преку измени и дополнувања на законот, каде што ќе се избере специјален обвинител во новоформирана обвинителска структура, со неколку заменици, обвинители, стручни служби, со целосна автономија и независност на обвинителот, со можност да избира истражен центар со инспекторите коишто ќе ги бира, со стручни соработници, достоинствена плата, обезбедување на него и на неговото семејство. Сé што ќе гарантира целосна автономија за да тргнат процесите“, изјави Заев при посетата на Тетово.

Денешното враќање на СДСМ во Собранието помина во жешка атмосфера и нивните колеги од владеачкото мнозинство им порачаа дека ќе мора напорно да работат за платата која ја добиваа изминатите месеци и дека мора да го почитуваат Уставот, Деловникот и законите при нивнотото функционирање. За договор за назначување на Специјален обвинител има голем пристисок и од олеснувачите на процесот од ЕУ.