Заев очекува Собранието ефикасно ќе го разреши Зврлевски пред локалните избори

Премиерот Зоран Заев очекува Собранието уште пред локалните избори го разреши јавниот обвинител Марко Зврлевски и додава дека верува во ефикасноста на законодавниот дом.

– Очекувам тоа да се случи дури и пред годишниот одмор на пратениците, бидејќи во спротивно би било банално. Мислам дека процедурите се јасни. Верувам во ефикасноста на Собранието затоа што таа ефикасност во носењето одлуки ќе ја придвижи Македонија кон нејзините цели. Дел од тие цели се конечно враќање на независното правосудство, како една од најзначајните реформи што Македонија и македонските граѓани си ги имаат поставено пред себе – рече Заев при посетата на воениот полигон Криволак, каде се одржува македонско-американската воена вежба „Змеј заштитник 17“, одговарајќи на новинарско прашање.

Тој уште еднаш истакна дека главна цел на Македонија е полноправно членство во НАТО и во Европската Унија.

– Сите во светот знаат кон што е ориентирана Македонија. Уште еднаш ќе потврдам дека ние сакаме соработка со сите земји, но нашата цел е полноправно членство во НАТО и полноправно членство во ЕУ. Тука нема дилеми. Овие вежбовни активности испраќаат една многу вредна порака, а тоа е соработка во обезбедување на севкупниот мир во светот и слободата на сите граѓани во светот – рече Заев.