ВМРО-ДПМНЕ бара одговорност Спасовски за вчерашното убиство во Струга

Наместо во екот на сезоната Струга да брои туристи, ние броиме престрелки, жртви, инциденти и колку пати над дозволеното депонијата го загадува воздухот, обвини денеска Дејан Пауноски, претседател на ОК на ВМРО-ДПМНЕ Струга.

– Власта, и локална и централна, се директно одговорни за хаосот што го гледаме од ден на ден во Струга. Вчера среде бел ден беше убиено едно лице. Како да нема полиција. Убиецот си влетал во барот и си пукал. Струга и стружани се вознемирени и исплашени. Стравуваат за својата безбедност и сопствените животи. Стравуваат за животите на своите блиски бидејќи гледаат дека полицијата под раководство на СДС нема капацитет да ги заштити – вели Пауновски додавајќи дека вознемиреноста на стружани се одразува на гости.

СДС со својата неодговорност и неспособност целосно ја уништува Струга.

– Најпрвин ја видовме неспособноста на влада од 25 министри да го изгаси пожарот во локалната депонија кој ги задуши стружани и ги избрка туристите. Вчера се случи и свирепо убиство на плажа среде бел ден пред угостителски објект во екот на туристичката сезона. СДС и неспособната влада на Заев се директно одговорни за пропаднатата туристичка сезона како резултат на еколошката катастрофа и загрозената безбедност во Струга – вели Пауновски.

Тој побара одговорност од Оливер Спасовски поради криминални пресметки во Струга, како и одговорност од градоначалникот и министерот за животна средина Садула Дураку кои дозволија неколку месеци стружани да се гушат во чад поради неможноста да го изгаснат пожарот во локалната депонија.