Видео: Протести против Вучиќ – Белград и Нови Сад на нозе против диктатурата

Неколку стотици Срби, претежно млади лица без партиски симболи, се собраа вечерва пред зградата на српскиот Парламент со цел да изразат незадоволство од резултатите од вчерашните претседателски избори во земјата, на кои, според прелиминарните резултати, српскиот премиер Александар Вучиќ извојува убедлива победа. Протестите времено го блокираа движењето во центарот на Белград. Демонстрантите се организираа преку фејсбук групата „Протести против диктатурата“.

Бидејќи гласовите се уште се пребројуваат има шанса за втор круг, а ако се стигне до него, протестите ќе им послужат на трите милиони лица кои не гласале, се наведува во групата на Фејсбук. Учесниците во протестите се сомневаат дека изборите се чесни.

– Се собравме пред Парламентот бидејќи изборите се одвиваа многу недемократски, особено во Белград – истакна еден од демонстрантите.

Протести има и во Нови Сад под слоганот „Војводина против диктатурата“.

Српскиот премиер Александар Вучиќ освои 55 проценти од гласовите на вчерашните претседателски избори во Србија. Победата сепак не беше прифатена од страна на опонентите на Вучиќ, кои синоќа во своите обраќања ги прогласија изборите и изборната кампања како нелегитимни. Паднаа и обвинувања кон медиумите, особено кон јавниот сервис, поради селективното и небалансирано известување.