(Видео) Општина Центар руши дивоградба на „Самоилова“ и „Никола Карев“

Општина Центар како што најави реши да ја спроведе акцијата за рушење на дивоградбата која се наоѓа помеѓу улиците „Самоилова“ и „Никола Карев“. Рушењето започна рано утринава, во 3:30. Со асистенција на МВР, градежна фирма која била избрана на тендер го изврши решението донесено од страна на овластен градежен инспектор на општината за отстранување на дивата градба.

Ниту утрово на местото на дивоградбата не се појави инвеститорот на објектот, кој сеуште е непознат. Претходно, кога објектот беше во фаза на ископ, овластен инспектор донесе решение за враќање во првобитна состојба. Тогаш решението никој не го прими, а непознатиот инвеститор без одобрение продолжи со градбата.

Дека се работи за дивоградба, констатираа заеднички на увид инспекторот на општина Центар, заедно со градежен инспектор од Државниот инспекторат за градежништво и урбанизам. Неколкупати на објектот беше оставана покана инвеститорот да дојде во општина Центар, но на ова никој не се одѕва.

Дивото градилиште два пати беше затворано со цел да се постапи по решението за отстранување на градбата.

Градоначалникот на општина Центар ги потпиша документите и барањето до МВР за да може да се започне со постапката за извршување.

По добиената согласност од МВР, рано утринава се пристапи кон уривање на објектот.

Општина Центар внимателно ќе ја следи состојбата на терен и нема да дозволи дивоградби на територија на општината, се вели во соопштението.