Ветеранот Томи Стефановски трет на маратонот во Канада

Македонскиот маратонец во пливање Томи Стефановски (44) го освои третото место на трката во Сен Жан во Канада во рамки од Гран-при серијата на ФИНА.

Патеката долга 32 км., македонскиот маратонец ја преплива со време од 6:39.28,48 часа и повторно се искачи на подиумот на престижната трка во маратонското пливање. Успешен настап имале и другите двајца македонски маратонци, Евгениј Поп Ацев го освои петтото место со време 6.41:42 часа, а Александар Илиевски заврши на деветтата позиција со 6.52:20.

Првото место во машка конкуренција го освои Американецот Александер Мајер, а пласман пред Стефановски оствари и Италијанецот Едоардо Стокино. Во женска конкуренција триумфирала Русинката Олга Козидуб.

По маратонот во Канада, во Гран-при серијата сега следува Охридскиот маратон на 20 август, а потоа и маратонот на 4 септември во Капри, Италија.