Вардар непоразен се прости од настапите во Европа
Вардар прикажа многу поквалитетно лице на домашен терен против АПОЕЛ, со поголем број на шанси и теренска иницијатива, но една мала грешка во второто полувреме беше доволна за Де Винсенти да постигне лесен гол. Тоа значеше дека Вардар мора да брка два гола бидејќи планот за „нула“ пропадна. Се до судиското продолжение се чинеше дека е загубено, но во едно нафрлање од Попов и мешаницата пред голманот Вотерман најснаодлив беше Љамчевски кој ја протна топката во мрежата.
До крајот се играа уште две минути, но вардарци немаа сили за целосен пресврт. Вардар на овој начин достојно се прости од Европа, што наиде на голема подршка од домашните навивачи кои го проследија натпреварот мирно и без инциденти.
Пред почетокот на средбата малата група на гостински навивачи се обиде повторно да испровоцира со истакнување на грчки знамиња, но редарската служба интервенираше навремено и спречи било какви инциденти.