Thursday, Mar 28, 2024
HomeФЕР ПЛЕЈРакометВардар е шампион на СЕХА, ќе се брка чудо и во Лига на шампиони

Вардар е шампион на СЕХА, ќе се брка чудо и во Лига на шампиони

Ракометарите на Вардар ја освоија титулата во регионалната СЕХА лига со победата во финалето над Веспрем 26:21 (11:11). „Црвено-црните“, на завршниот турнир кој се одржа во Брест, Белорусија, ја освоија третата титула во регионалната лига (2012, 2014, 2017).

Вардар својата доминацијата во регуларниот дел од сезоната во СЕХА лигата ја заокружи со титулата која ја освои на завршниот турнир во Брест. Во финалето македонскиот шампион ја прекина двегодишната доминација на Веспрем и стана најуспешниот тим во ова натпреварување.

Беспрекорната игра во одбраната, со која од голот командуваше Арпад Штербик, беа клучни за победата на Вардар.

Натпреварот во кој доминираа одбраните, Вардар го реши со серијата 5:0 во периодот од 43. до 50.минута. Вардар последните 17 минути, при резултат 17:17, ги заврши со серија 9:4.

Македонскиот шампион, со исклучок на првот напад, кога првиот гол на мечот го постигна Лекаи, константно беше во водство. Имаше Вардар 8:6 во 13.минута, потоа 10:8 во 25-та, а егал на полувреме (11:11) донесе Наѓ во последната секунда кога погоди од гол на гол.

Првата предност од три гола (17:14) Вардар ја имаше во 40.минута, потоа во наредните три минути Веспрем израмни на 17:17, по што, во наредните седум минути, голманот Штербик и одбраната, иницираа серија од пет гола, по која Веспрем не успеа да се врати.

Штербик на крајот имаше 12 интервенции, додека стрелците кај Вардар ги предводеа Канељас и Дибиров кои постигнаа по пет гола, односно Марсениќ кој постигна четири гола.

Најдобар играч на Веспрем беше голманот Алиловќ со 13 одбрани.

На завршниот турнир третото место го освои домаќинот Мешков со победата над Загреб 23:19.

Вардар со освоената СЕХА титула ќе добие дополнителен ветар во грб за наредните четврт-финални дуели од Лигата на шампионите против Фленсбург на 22 и 29 април со што ќе се брка историскиот фајнл-фор во историјата на мекедонскиот ракомет.

Извор: sportski.mk