Ванхауте во последна мисија да ги седне партиите
Медијаторот Питер Ванхауте утринава ги свика на разговори работните групи на политичките партии за изнаоѓање решение за прочистување на избирачкиот список што беше главен мотив опозицијата во петокот да најави дека нема да излезе на избори во април бидејќи не се исполнети сите договорени реформи од Пржино. Исто така ќе се разговара и за функционирањето на Државната изборна комисија и нејзините надлежности пред, за време и по изборите.Се уште е рано да се даваат прогнози за исходот од овие обновени разговори со оглед на тоа дека во петокот и покрај огромниот притисок од ЕУ политичкиот дијалог доживеа целосно фијаско и повлекување на СДСМ. Притисокот врз опозицијата продолжува да расте со се позасилена пропаганда да се излезе на избори, а сите кои влегоа во овој процес очекуваат и сигнал како ќе се продолжи понатаму и кои се главните политички цели.