Friday, Mar 29, 2024
HomeДЕНЕШНАПолитикаВајгл, Кукан и Флекенштајн: Политички партии да дејствуваат во конструктивен дух на помирување

Вајгл, Кукан и Флекенштајн: Политички партии да дејствуваат во конструктивен дух на помирување

Тројцата европратеници Иво Вајгл, Едуард Кукан и Кнут Флекенштајн го поздравија формирањето на новата влада и порачаа сите партии да дејствуваат во конструктивен дух на помирување. Тие порачуваат дека по три одлагања заради политичката несигурност, очекуваат Европскиот парламент да гласа за извештајот за државата за 2016 година на закажана седница во јуни.

„Исто така, се радуваме на соработка на Европскиот парламент со Собранието за исполнување на аспирациите на граѓаните и за неопходните реформи кои ќе и овозможат на државата да преземе конкретни чекори кон членство во ЕУ“, стои во изјавата од тројцата европратеници.

Тие му честитаа на Заев за формирањето на новата влада.

„Му честитаме на премиерот Заев за формирањето на новата влада и нејзината програма. Охрабрени сме од конструктивната парламентарна дебата за програмата и од заложбата на владата да ја обедини земјата околу една програма што треба да им служи на сите граѓани, да испорача резултати за итните реформски приоритети и да работи на евроатлантска интеграција. Се надеваме дека сите политички партии сега ќе дејствуваат во конструктивен дух на помирување, за заеднички интерес на сите граѓани и ќе работат со новата влада на враќање на довербата во државата и нејзините институции, вклучувајќи целосно спроведување на Договорот од Пржино и реформски приоритети. Македонскиот народ веќе долго чекаше и заслужува да види дека новата влада енергично напредува во својата инклузивна и реформска агенда“, се вели во заедничкото соопштение на Вајгл, Кукан и Флекенштајн.