УНЕСКО не размислува да го тргне Охрид од листата на заштитени природни богатства
Тројца експерти од Светската организација за заштита на природното и културно наследство деновиве ќе вршат мониторинг во Охрид. При денешната посета тие ги демантираа тврдењата дека размислуваат Охрид да го тргнат од листата на заштитени природни богатства.
– Никогаш не било разгледувано прашањето Охрид да биде избришан од листата на светските заштитени природни и кутурни богатства на УНЕСКО. Тоа денеска го изјави Ања Сидоренко, пренесува Алсат-М.
Сидоренко и нејзините колеги во Охрид вршат увид во спроведените активности на терен и на крај ќе дадат оценка колку се почитуваат нивните препораки за обемот на градежните зафати и нивното влијание врз животната средина и културното наследство. Денеска имаа средба со раководството на „Завод за заштита на спомениците на културата и Музеј – Охрид“, следни се Античкиот театар, Плаошник, црквите „Света Богодорица Перивлепта“, „Света Софија“ Галеријата на икони и објекти на кои се преземени конзерваторски активности.
-Остваривме средба со цел да го видиме прогресот и напорите на локалните и националните власти во заштитата на културното наследство и спроведувањето на забелешките на УНЕСКО изнесени на минатогодишната 40-та седница на организацијата одржана во Истанбул, рече Сидоренко.