Турските власти знаат кој стои зад бомбашкиот напад

Истрагата на турските власти во почетната фаза дошла до заклучок дека крвавиот терористички напад во градот Суруч бил извршен од бомбаш самоубиец, член на силите на ИСИС, планирајќи го нападот против курдски активисти кои сакале да се вратат во Кобане, градот кој беше сурово масакриран од милитантите.

Ахмет Давотугло изјави дека се следат сите можни аспекти на нападот, дали има поврзаност со ИСИС и со домашните терористички структури и дека напаѓачот е идентификуван, но се уште не се открива за јавноста.

Денес во Истанбул се одржаа и демонстрации барајќи одговорност и осуда за нападот, со обвинувања дека владата замижала пред заканите на ИСИС и избегнува мешање. Од друга страна, пак претседателот Реџеп Таип Ердоган го осуди насилството и оцени дека секој вид на тероризам, без оглед на мотивите, нема нација и вера и мора да се спречи.

Во нападот во културниот центар во Суруч загинаа 32 лица, а уште стотина беа ранети. Утре ќе се одржи средба на кабинетот каде ќе се разговара за безбедносната ситуација во Турција, особено во делот на границата со Сирија.