Ципрас се соочува со побуна во своите редови
Грчкиот премиер се соочува со тешка битка да добие поддршка од коалиционите партнери за конечниот предлог на лидерите на еврозоната за спас на Грција. На Ципрас му се заканува „побуна“ во сопствените редови поради неговиот менлив став во преговорите за мерките за финансиска помош.
Министерот за енергетика, Панајотис Лафазанис, кој ја предводи „левицата“ во владејачката Сириза, го оцени договорот со лидерите од еврозоната како неприфатлив, додавајќи дека истиот го поништува мандатот на народот и грчкото „Не“ на референдумот.
Од вкупно 149 пратеници на Сириза, 30 радикални левичари од овој табор му го свртеа грбот на Ципрас поради попуштањето пред меѓународните кредитори. И додека коалициониот партнер Анел се закнуваше дека нема да го подржи предложениот пакет мерки, Ципрас се обидува на пратениците да им ја објасни промената на курсот во Брисел.
„Билд“ пишува дека Ципрас размислува и за оставка, како би го отворил патот за формирање привремена техничка влада и распишување нови избори. Според ова сценарио, Ципрас во текот на утрешниот ден заедно со претставниците на опозициските партии би ги усвоил мерките за штедење во парламентот, по што владата би поднела оставка.
Поранешниот министер за финансии, Јанис Варуфакис, изјави дека би бил изненаден доколку Ципрас сака и понатаму да остане премиер, не исклучувајќи ја можнoста за вондредни избори. Договорот помеѓу ЕУ и Грција тој го окарактеризира како „нов Версајски Договор“.