Тројца Руси уапсени поради поврзаност со терористичкиот напад

Тројца руски државјани се уапсени од страна на турската полиција под сомнение дека се вмешани во терористичкиот напад што се случи во вторникот во Истанбул, кога беа убиени 10 луѓе, а 15 беа повредени. Русите биле приведени во Анталија.

Во терористичкиот напад на плоштадот Султанахмет, при разнесувањето на бомбаш самоубиец беа убиени 10 луѓе, а 15 беа ранети. Турскиот претседател Реџеп Таип Ердоган изјави дека сириски бомбаш самоубиец е одговорен за експлозијата во историскиот дел на Истанбул.

Потпретседателот на турската влада Нуман Куртулмус, изјави дека врз основа на анализа на различни делови од телото идентификуван е осомничениот бомбаш-самоубиец.

Претходно денеска официјалните власти во Анкара објавија дека веќе се уапсени 59 лица при контратерористичните операции кои почнаа во пет градови, соопшти “Хабер Турк”. Операцијата е спроведена во Анкара, Шанљурфа, Мерсин, Килис и Адана.

Според телевизијата Хабер Турк, од 16-мината уапсени во Анкара, дури 15 се државјани на Сирија, кои по завршувањето на истрагата се очекува да бидат протерани од Турција. Меѓу уапсените во останатите градови има и поголем број турски државјани, кои се товарат за „терористичка активност“, што би можело да значи и дека се поврзани или се членови на Курдската работничка партија (ПКК).