Три македонски компании добија дозвола за извоз во Русија

Три македонски компании, добија можност да извезуваат млечни производи на пазарот на Руската Федерација и во Евроазиската Царинска Унија, чија што членка е оваа држава, заедно со Казахстан, Белорусија, Киргстан и Ерменија. Балканска млекара-Скопје, Бучен Којак-Куманово и Здравје Радово со производните единици во Куманово и во Струмица, ќе го освојуваат рускиот пазар.

Официјалната делегација на руската служба за ветеринарен и фитосанитарен надзор „Россељхознадзор“, која всушност одлучува дали некоја компанија ќе добие дозвола за извоз во Руската Федерација, посети 15 македонски капацитети од млечната и месната индустрија. Останатите 11 производни капацитети кои не добија зелено светло од руската инспекција, имаат рок од 60 дена да ги надминат укажаните недоследности и забелешки, со цел усогласување со руското законодавство и добивање шанса да пласираат млечни производи во Евроазиската Царинска Унија.

Официјалниот извештај со забелешките од „Россељхознадзор“, веќе е проследен до Агенцијата за храна и ветеринарство, која во зададениот рок треба да изврши увид во тоа дали бараните недостатоци се исправени, за да и останатите 11 македонски компании добијат дозвола за извоз во Руската Федерација, појасни извршниот директор на Македонското-руска стопанска комора, Дејан Бешлиев.

Тој го најави и Саемот на храна во Москва, „Мир Питание 2015“, каде што ќе се претстават македонски производители на овошје и зеленчук. Веќе се најавени средби со претставници од Москва кои се заинтересирани за соработка, односно увоз на македонски овошје и зеленчук, а ќе биде организиран и еден вид едукативен семинар за македонските извозници со службата „Россељхознадзор“, во врска со потребните стандарди за гаранцијата и потеклото на производите, нивната безбедност и квалитет.